𝐈𝐍 𝐏𝐇𝐎𝐓𝐎𝐒 | 𝐀𝐫𝐚𝐰 𝐧𝐠 𝐊𝐚𝐥𝐮𝐬𝐮𝐠𝐚𝐧 𝐩𝐚𝐫𝐚 𝐬𝐚 𝐀𝐫𝐚𝐰 𝐧𝐠 𝐏𝐚𝐬𝐢𝐠 𝟐𝟎𝟐𝟓

Matagumpay na naisagawa ang iba’t ibang programang pangkalusugan ng Pamahalaang Lungsod ng Pasig bilang bahagi ng selebrasyon ng Araw ng Pasig 2025 ngayong araw, July 1, 2025.

Una na sa mga programang naisagawa sa Temporary Pasig City Hall ay ang 𝐋𝐢𝐛𝐫𝐞𝐧𝐠 𝐁𝐚𝐤𝐮𝐧𝐚 𝐊𝐨𝐧𝐭𝐫𝐚 𝐏𝐧𝐞𝐮𝐦𝐨𝐧𝐢𝐚 para sa 1,000 senior citizens at persons with comorbidities. Ang mga benepisyaryo ay napili mula sa mahigit 1,600 registrants sa online registration at nakatanggap ng confirmation message mula sa Immunization Program ng City Health Department (CHD) na nagsasabi na sila ay eligible makatanggap ng bakuna. 

Kasabay ng bakunahan ay ang 𝐋𝐢𝐛𝐫𝐞𝐧𝐠 𝐏𝐮𝐬𝐭𝐢𝐬𝐨 𝐩𝐚𝐫𝐚 𝐬𝐚 𝐏𝐚𝐬𝐢𝐠𝐮𝐞𝐧̃𝐨 para sa 56 na indibidwal, partikular na ang mga senior citizens at mas bata pang Pasigueño na nangangailangan ng full dentures. Ang mga nabigyan ng libreng pustiso ay ang mga karaniwang pasyente na regular na nagpapakonsulta at naga-avail ng dental services sa Barangay Health Centers sa lungsod. Sa programang ito, kitang-kita na ang mga benepisyaryo ay nabigyan ng panibagong ngiti at kumpiyansa sa kanilang mga sarili dahil sa kanilang mga bagong pustiso. 

Para sa kaalaman ng lahat, ang libreng pustiso ay parte ng continuing program ng CHD. Para makapag-avail, magtungo lamang sa pinakamalapit na health center sa inyong lugar at hanapin ang assigned dentist upang makapagparehistro at malaman ang iba pang detalye tungkol sa programa. 

Isa rin sa mga programang pangkalusugan na ginanap sa Temporary Pasig City Hall ay ang 𝐊𝐢𝐜𝐤 𝐎𝐟𝐟 𝐂𝐞𝐫𝐞𝐦𝐨𝐧𝐲 𝐧𝐠 𝟐𝟎𝟐𝟓 𝐍𝐚𝐭𝐢𝐨𝐧𝐚𝐥 𝐍𝐮𝐭𝐫𝐢𝐭𝐢𝐨𝐧 𝐌𝐨𝐧𝐭𝐡 na may temang “Food at Nutrition Security, Maging Priority! Sapat na Pagkain, Karapatan Natin!” 

Bilang bahagi ng programang ito, namahagi ng mga punlang namumunga at buto ng gulay sa mga empleyado ng Pasig City Hall at sa mga dumalo mula sa iba pang programang pangkalusugan ngayong araw. Layunin ng pamamahagi na ito na maitaguyod ang sapat na nutrisyon at matiyak na ang bawat tahanan sa Lungsod ng Pasig ay may access sa masustansyang pagkain.

Bukod dito, nagsagawa rin ng munting laro ang Pasig City Nutrition Committee, katuwang ang iba’t ibang partners na nagbigay ng kanilang fortified food products. Sa pamamagitan ng munting laro, mas naipakilala sa mga kalahok ang kahalagahan ng pagkain ng prutas, gulay, at isda.

Nagbigay din ng vitamins at iba pang uri ng gamot ang Pasig City Medical Supply Depot para sa mga dumalo sa aktibidad. 

–

Samantala, isinagawa rin ngayong araw ang launching ng 𝐁𝐢𝐫𝐭𝐡𝐜𝐚𝐫𝐞: 𝐁𝐢𝐫𝐭𝐡 𝐌𝐨𝐧𝐭𝐡 𝐇𝐞𝐚𝐥𝐭𝐡 𝐂𝐡𝐞𝐜𝐤 𝐩𝐚𝐫𝐚 𝐬𝐚 𝐒𝐞𝐧𝐢𝐨𝐫 𝐂𝐢𝐭𝐢𝐳𝐞𝐧𝐬 na ginanap sa Brgy. Sta. Lucia Covered Court. Sa programang ito, maaari nang makapagpa-Annual Physical Examination ang lahat ng senior citizens ng lungsod tuwing buwan ng kanilang kaarawan o tuwing sasapit ang kanilang 𝙗𝙞𝙧𝙩𝙝 𝙢𝙤𝙣𝙩𝙝.

Sa launching ng programa, nasa 41 senior citizens ang natanggap ng libreng medical services gaya ng mga sumusunod: Complete Blood Count (CBC), Urinalysis, Blood Chemistry, X-ray, at iba pa. 

Para sa senior citizens na nais mag-avail ng libreng programa na ito, magtungo lamang sa pinakamalapit na Super Health Center sa inyong lugar, o bumisita sa Pasig CHAMP o Pasig City Sports Center anumang araw ng inyong birth month, at huwag kalimutang dalhin ang inyong Senior Citizen ID. 

#ArawNgPasig2025 #KalusugangPangkalahatan